١٨ شوال ١٤٢٨ هـ

بطاقة البنك و الآيــفوون



أخيراً رجعت لي بطاقة المكافآت...بعد تقريباً شهرين من سحب البنك البطاقة مني، لأنها إنتهت مدتها(يعني ماتصلح للأكل!!)....حصلت عليها قبل كم يوم!. توي متفرغ أروح لمركز شؤون الطلاب علشان أستلمها!...أصلاً مابغيت أستخدم البطاقة علشان أوفر كم قرش، فجاء البنك جزاء الله خير و سحب البطاقة، يعني كنت عايش بدون مكافأة لمدة شهرين.هههه

و النتيجة من هالإنتظار كانت أني وفرت ألفين إلا عشرين ريال...طبعاً ألفان ريال مبلغ مو سهل(بالنسبة لي)، و الواحد يبدأ يحير.. إيش يشتري فيهم...جاء على بالي أشياء واجد..إكس بوكس، جي بي إس، ولا أغراض للسيارة...جلست أفكر بس مو جاي على بالي شي....لين بعدين في ذاك اليوم و أنا أتصفح منتدى جدة بويز للسيارات، جفت واحد أسمه أحمد(إداري في المنتدى) ، حاط إعلان عن الآيفون، هو يشتريه من أمريكا و يشحنه لسعودية و ياخذ عمولة بسيطة، طبعاً أحمد ساكن هناك، يدرس في جامعة كاليفورنيا...المهم..كان السعر إلي حاطه حلو...فـ مافكرت كثير، على طووول إتصلت عليه و إتفقت على طريقة التسديد و كم شغله ثانية...و اليوم أودعت له القروش في حسابه عن طريق البنك و كلمته بعدين وقالي أنه بيشحنه إنشاء الله اليوم و بيكون عندي إنشاء الله يوم الإثنين. عـاد أنا الحين مو قادر أنتظر ليوم الأثنين، سوبر متحمس. هههه

-----------------------------------------------------------------------------------


هناك ٨ تعليقات:

乂♥Not.ViRGo♥乂 يقول...

الله يعطيك خيرها و يكفيك شرها ان شالله

ما تبي اشحن لك سيارتي :))))

بعدين انت تثق باي شخص في النت و تدزله المبلغ بمجرد مكالمات تليفون ..

عيل حولي مبلغ و انا ادزلك فراري لووووووووووووووووول

boy_z3 يقول...

مـشكوره أختي :)

لوول..أكيد ما أثق في أي واحد..بس أحمد أعرفه من زمـاان و هو واحد من إداري المنتدى...يعني الولد يستحق الثقة!
n_n

W542658745s يقول...

ماشاءالله .. عالبركة الآيفون مقدما :)
بالنسبة لي .. افضل اشتري ipod touch
بالاضافة لاي جهاز نوكيا
على الايفون لحاله

ادري ناس كثير يقولون العكس ... بس راسي يابس شوي :)

عموما ترانا سوبر متحمسين نعرف رايك فيه

boy_z3 يقول...

مشـكور أخوي بريد235 :)

الآيبود تش نفس تصميم الآيفون، بس حط فيه جوال، بس شكلك ماتحب منتجات الثلاثة في واحد.لول
:P

عـاد الحين لازم تكتب عن الآيفون في الموقع حقك مع "الوي" و "الآيبود"! ههه
(;

W542658745s يقول...

عارف ان كثير يقولون وفر على نفسك واشتر الايفون واستخدمه كجوال ومشغل ام بي ثري
لكن الايفون مادخل مزاجي مره ... يعني يفتقر الى اهم ميزات الجوال العادي

عموما الاختلاف بالراي لايفسد للود قضية :)

boy_z3 يقول...

هممم...صحيح أنه يفتقر لمميزات كثيرة...بس أغلبها أنا ما أستخدمها. ^^

و نستى نشوفك تكتب عن الآيفون في الموقع ياعبدالله، و بكذا بتزيد نسبة المتابعين للموقع!
(;

Yumi يقول...

وهذا هو الاي فون اللي الكل يتكلم عنه
كنت افكر فيه قبل فترة اسوي عليه بحث واشوف شو سالفته بس دايماً انسى، ما ادري ليش انا والتلفونات ما نركب مع بعض خخخخ

ألف مبروك اخوي على الاي فون، ولا تنسى تقول لنا رايك فيه
هل هو سهل الاستخدام ولا لا؟
وعيوبة ومحاسنة
ما تدري.. يمكن نروح نشتري لنا واحد.. لاني من سنة اصيح تلفون جديد
:P

boy_z3 يقول...

مشكوره يومي_شان ^^

وإنشاء الله إذا حصلته نقول لج راينا فيه.

n_n